Tiervuođah Kajo-leeirást!

Read the article in English here

Kajo lii Suomâ 8. Finnjamboree, ađai stuorrâ várdámleirâ, já toos laa čokkânâm suullân 13.000 várdáájeijed. Sämienâmist laa lamaš fáárust várdáájeijeeh vissâ juáhháá Finnjamboreest, mutâ taat lii vuosmuš tohe, ete leirâloostâst čálloo anarâškielân.

Anarâškielâ lii ohtâ kuulmâ sämikielâin, moh sárnojeh Suomâst. Puđâldâsah iä lah ennuv sämikielân, mutâ várdám lii härvisâš spiekâstâs. Ivveest 2018 Anarist algâttui várdámtoimâ anarâškielân ucjuávhuust nelji párnáid. Onnáá peeivi laa kyehti juávhu (čiivgah já puohajeijeeh), main ohtsis laa 13 pärnid. Orjâlâškielân já nuorttâkielân ij lah várdám, tastko taankielâliih várdámjođetteijeeh iä vala kavnuu.

Várdámtooimâ algâttem anarâškielân ij lamaš älkkee. Puoh várdámsäänih kolgii keksiđ, moos finnejui mudoi iše sämitiggeest já anarâš kielâkomiteast. Várdámamnâsijttáá lii motomin hástulâš orniđ várdáám. Suomâ- já ruotâkielâliih jođetteijeeh pyehtih väljiđ kirjeráájust maaŋgâin mainâskiirjijn, ko halijdeh luuhâđ mainâs várdáámist. Anarâškielân laa nuuvt uccáá kirjeh, ete párnááh laa kuullâm juáhháá jo maŋgii sehe škoovlâst ete pääihist. Ruttâ várdámmainâsij jurgâlemân ij vala lah kavnum.

Várdámlavluuh iä meidgin vala lah kullum, mutâ toos puátá horgâ nubástus: vuosmuuh kulmâ várdámlavluuh laa eidu jurgâlum anarâškielân. Já sämitigge lii jurgâlmin čiivgâi kirje (Sudenpennun jäljet), te horgâ sämikielâlijn várdáájeijein lii aainâs-uv ohtâ aamnâs kevttimnáál. Anarâškielân tot lii nuuvt stuorrâ riggodâh já iše, ete tot lii suomâ- já ruotâkielâláid vaigâd iberdiđ. Motomeh ulmuuh laa kuittâg Finnjamboreest máttám maidnii sämmilij háástuin ja laa uápásmâm sämmilâš kulttuurân.

Aanaar Tuodârkuumpih uárnejii sii leirâsiijdâst máhđullâšvuođâ spellâđ sämmilijd ärbivyehisierâid. (Kove: Heikki Heinonen)

Kajo-leeirâst laa Aanaar Tuodârkuumpih -lippukoddeest (Inarin Tunturisudet) kyehtnubáloh olmožid fáárust. Kulttuurehidist (17.7.) sij uárnejii sii leirâsiijdâst oovtâst uđđâ várdámskipárijdis Lammist, Ryttyläst, Liperist, Tervakoskist, Tikkamäkist já Stuorrâ Britanniast máhđullâšvuođâ spellâđ sämmilijd ärbivyehisierâid. Tast finnejuvvii čuuvtij mieđes macâttâsah.

(Kove: Kikke Klaver)

Iänádâh Aanaar lippukoddeest, kiäh laa fáárust Kajost, laa rävisulmuuh, neeljiš laa nuorah. Ohtâgin sist ij lah sämivárdáámist. Tastko sämivárdám algâttui nelji ive tássááš, iä vala lah sämikielâliih vyetteeh. Čuávuváá Finnjamboreest puávtah te tuáivu mield teiviđ sämikielâlijd nuorâ várdáájeijeid.

Ličijba hitruu jis talle sämikielâ oinuuččij leeirâst om. tego Hile-leeirâst: tobbeen lijjii puoh koolbah kulmâkielâliih — suomâ, eŋgâlâs já anarâškielân. Jispa 9. Finnjamboreest koolbah liččii siämmáámuđusiih? Teikâ neljikielâliih, jis váldá vala ruotâkielâ-uv fáárun? Ij tot lah vaigâd rähtiđ já siämmáást lii hirmâd hitruu já ávhálâš uáiniđ saanijd jieijâs kielân.

Várdámšoddâdem anarâskielân: https://partio-ohjelma.fi/smn/

Tekstâ: Kikke Klaver
Koveh: Kikke Klaver, Heikki Heinonen